1Th 4 | BEF | STEP | Lalalutigita, Sipi Boti Yesuhi ai gi'alo lenegekesa lito ka mone lu lepilugi kehelilo. Lali Hu'ma kehelito lenofokehi lilina hapa'a alenelepi'ohuta yagi ana suko neminana keheli'ohutaya to lepiba lepiba ka mone hiti amuya melete mege'i malalo luto nolune.

1 Thessalonians 4

Minoto lito hinogo Hu'mau kehelinogo bati hilina kaga

1 Lalalutigita, Sipi Boti Yesuhi ai gi'alo lenegekesa lito ka mone lu lepilugi kehelilo. Lali Hu'ma kehelito lenofokehi lilina hapa'a alenelepi'ohuta yagi ana suko neminana keheli'ohutaya to lepiba lepiba ka mone hiti amuya melete mege'i malalo luto nolune. 2 Lali lu lepi'ohuta ka lali kati meni'ibe. Sipi Boti Yesuhi bagaguti ka'a lu lenelepi'ohutamo ya'ma akeheli'ahabe. 3 To mone ka hiti ni'ibe. Lenali kumu Hu'mau lu molo'ehina ka'a ma ni'ibe. Sigiminaya li he'mite komopatini lamana hinogo minalo. 4 Lenali eto eto hite ya'ma komopatini le'mo bati hite fotogo hite lihatini lilabe. 5 Moko lise lenegekesa kehelise bo alobo topa helatana yamofihi meni'ibe. Fegutoga bona'magi enali Hu'mamofihi hapa'a mekehelilata nehite ya'ma foipa suhi hilata nehago lenali ya suhi hi lalabe lutomo ni'ibe. 6 Aku'i lenali folagahatinigu bona'i moneuba ana'i kumu foipana hilina'a meni'ibe. To lalu'afihi liha'a lilina meni'ibe. Yamofihi nasana lilana bona'iya Hu'mau osahi epilina'mu yabe luto kohe toto lu laga huto lu lepi'ohutamo ni'ibe. 7 Ya foipanaloti komopatini kolo tenogo minalabe luto meni'ibe. Komopatinigu babahi minalabe luto Hu'mau elesa molo epi'ehina. 8 To ya'mu ana kaga mege'i emilina bouba fa'mene bona'magihi ka he'mi'ehina meni'inaya ai'a. Hu'ma Sikalafu'i lepilatamofihi megesa hu emilata nohibe.

9 To lenali Yesuhi bona'a luga'amagi komopatini epilabe luto hena'mu fayahana lepiba lepiba hilune? Hu'mau komopatinigu ai lenemehi eminogo ai lenemehi eminogo hite minalabe luto'a hapa'a lu epi'ehinamo ni'ibe. 10 Lenali ya'ma Yesuhi bona'a Masetonia metoga noto noto'i nehana bona'magihi asaga'i enele'mo bati hilata nehanaya aku'i hofa toto napa hilibe luto lenegekesa lito lu nolepune. 11 To kaga mone ma luto lu lepi'ohuta yatai aku'i nolune. Hololu luto bila ela mehise fulu hite minete ka sipi boe bae melise legeso hite lamana hite minete fato bomofihi foya'amu mekehelise lenalitini foyatinimu kehelite minete lenalitini lenayahatinitu foya lite nalana'mu kehelite minalo. 12 Ya hite minete, ya'ma fato bona'i enali nehanalo bo mone'mofihi nose'na'a kele kele'i mehise legeso hite minalabe. Lenali ya hite minenogo mono ka mekeheli'ahanamagi hapatini bu gelete lenofokehi lilete lenigi liyafa hilabe. To kagatini kehelilabe.

Sipi Boti i behe huto alina kana geba hilabe

13 Lalalutigita, lenali ya'ma fili'ahana bona'i enali kumu keheli ligitagahi hite Yesuhi mekeheli'ahana'amagi sibi hite minete yibi nama hite nemina suhi hi lalabe luto lu lepilugi kehelilo. 14 Lali ya'ma Yesuya fili'ehinaguti aku ho ti'ehinamo keheli amuya nomolone. Ya'mu ma luto kehelilune. Hu'mau ai Yesuhi le'mo gelehe huto alina yupahiya Yesu kumu keheli emilata nehana'a hiti fili'ahana bona'i ai'a hiti enele'moto alube'mu hibe.

15 Sipi Bomofihi kaga mone'a lu lepilune'mu nohune. Melugu'i lubu hiti nohuta Sipi Bouba nehetilina kanagu lali ya'ma fili'ahana bona'i enebe meligilutamo ni'ibe. 16 Sipi Bouba ai'a kokulumaguti limilube'mu nohibe luto yamofihi kaga'a kehe ito kanipo fite agelo bona'magihi kaba bo'aniuba nogo nemelenogo to Hu'mamofihi ufeha'a nefinogo limilina'mu yabe. Limilenogo Kilisitohi bona'i fili'ahana'amagi enali kohe tete ho tilana'mu yabe. 17 Ho tilenogo lali lubu hiti nohuta'a Hu'mau lele'mo tilenogo enali hiti Sipi Bo hiti sopopogu fo tula haluta'mu yabe. Ya huloto lali asaga'i Sipi Boti hiti mino lito buto minalune. 18 Ya hu'ehina'mu lenali kaga ya'ma lu keheli fa keheli hilete ai'i le'mo bati hinogo ai'i le'mo bati hinogo hite lenegelo bilata hite minalo.